BNG de TEO

Martiño Noriega Sánchez

Chámome Martiño Noriega Sánchez (A Coruña 22-02-75). Teño 32 anos e levo 28 vivindo no Concello de Teo. Sanitario de profesión, realicei a Especialidade en Medicina de Familia na área de Santiago de Compostela e ata fai 1 mes traballei como médico coordinador na Fundación de Urxencias Sanitarias do 061.
Son membro do Consello Nacional do B.N.G dende o 2006 e entrei na militancia nacionalista na Facultade de Medicina fai 14 anos participando nos CAF como representante dos estudantes no Claustro Universitario .
Levo dende fai 12 anos traballando politicamente no meu Concello dentro do B.N.G, sendo dende fai 8 anos Portavoz do seu Grupo Municipal.
O pasado 27 de Maio, a lista do BNG de Teo foi a máis votada nas eleicións municipais o que permitiu que a día de hoxe teñamos a responsabilidade da alcaldía.

Rafael Sisto Edreira

Nacido na parroquia de Luou (Teo), ten na actualidade 44 anos. Licenciado en Química pola Universidade de Santiago, é profesor de ensino secundario na especialidade de Física e Química. O curso pasado desempeñou o seu traballo no IES de Pontepedriña (Santiago). No pasado mes de maio obtivo o título de Doutor en Ciencias da Educación pola Universidade de Santiago, complementando un amplo traballo no campo da historia da ciencia e da historia da educación, especialidades nas que ten numerosas publicacións. Militante do BNG dende o ano 1984, na actualidade é responsábel de Organización do BNG na comarca de Santiago e membro da súa Executiva.

Carme Diéguez González

Naceu en Chandrexa de Queixa (Ourense) en 1965, residente en Teo dende 1997. Vive en Ribas, Oza. Licenciada en Filoloxía Hispánica e Galego-Portugues pola Universidade de Santiago. Profesora do IES de Barro. Concelleira do BNG en Teo dende 2005.

Carme Hermida Gulías

(Forcarei, 1961) é profesora titular da Universidade de Santiago de Compostela e imparte docencia na Facultade de Ciencias da Comunicación.
É autora de numerosos artigos de temática diversa, membro do equipo de redactores dos dicionarios de Edicións Xerais e, como tal, coautora do Dicionario Xerais castelán-galego, do Dicionario Xerais da lingua e do Gran Dicionario Xerais da lingua. É, ademais, directora de colección de literatura infantil e xuvenil da editorial Sotelo Blanco. É membro do Instituto da Lingua Galega dende o 1984 e dende o 1991 pertence ó seu Consello Científico. Foi secretaria da Asociación de Tradutores Galegos, presidenta das Redes Escarlata e secretaria e presidenta da Asociación de Veciños Raviña Valdés de Cacheiras.

Andrés Fernández Martínez

Naceu en Valdoviño no ano 1945. Reside no concello de Teo desde 1988, primeiro nos Tilos e desde 1999 en Raxó. Foi mestre no ensino público e delegado sindical da CIG-Ensino, actualmente xubilado. Foi responsable local do BNG en Teo.

Anxo Rey Martínez

Nado en Santiago no ano 1952, reside nos Tilos dende hai 25 anos. Casado e con dous fillos, foi socio fundador da A. VV. Os Tilos, da que foi vocal, vicepresidente e presidente. Foi igualmente promotor da coordenadora veciñal que creclamou a canalización completa da rede de gas nos Tilos, sendo o primeiro veciño de Teo en intervir nun pleno municipal en defensa de intereses veciñais.
Exerce o seu traballo profesional nunha entidade financeira galega, habendo sido membro da súa Asamblea Xeral e do Consello de Administración en representación dos seus traballadores.
Militante do BNG dende o ano 2002.