BNG de TEO
Contacta connosco:
Tfno: 628 606043- Correo: teo@bngteo.org
novas
O Concello presentou aos veciños dos Tilos o proxecto de reurbanización da rúa Castiñeiro
• O equipo técnico explicou as principais características de reforma que pretenden ser un modelo que identifique a urbanización .• O alcalde destaca “a humanización do espazo que se busca a través desta importante intervención”.
• O proxecto ten un presuposto de case medio millón de euros e está financiado polos fondos do FEIL.
O Concello presentou onte nunha reunión cos veciños/as dos Tilos o proxecto de reurbanización da rúa Castiñeiro, unha das arterias principais da urbanización na que se atopa o centro comercial e un dos accesos ao CEIP, ao centro de saúde e ao entorno da igrexa.
Segundo explicou o equipo técnico presente na xuntanza, a través desta actuación integral “búscase unha imaxe propia para a urbanización sen romper o equilibrio da mesma coa abundante natureza do entorno”. Esta obra nesta parte concreta da urbanización quere ser un proxecto piloto que sirva de modelo para trasladar de xeito flexible ao resto da zona.
O alcalde de Teo, Martiño Noriega, explica que con esta obra “búscase a humanización do espazo gañando terreo para as persoas”. O rexedor destaca de xeito moi positivo a reunión co colectivo veciñal dos Tilos e matiza “que este tipo de obras teñen que explicarse á cidadanía para que sexa partícipe da actuación no seu territorio”.
A obra na rúa Castiñeiro prevé actuar sobre 4.500 metros cadrados sumando o vial e a praza que está diante do centro comercial. En metros lineais a rúa a reforma da rúa chega ao redor dos 1.000 metros. As principais novidades da reforma son a nova organización do tráfico e a recuperación da propia praza que neste momento se usa só como aparcadoiro.
A rúa será de dobre dirección ata a zona do Centro Comercial onde se fará unha pequena rotonda para regular o tráfico e a partir dese punto ata o final da rúa será de dirección única cara o entorno do colexio. Entre os elementos previstos destaca unha marquesina de autobuses e unha escaleira en forma de terraza na parte baixa da praza que pretende ser un balcón verde sobre a urbanización.
Na reforma prevista ensánchanse as beirarrúas de cara a cumprir cos parámetros de accesibilidade e auméntanse os anchos dos carrís de circulación. Debido a estas melloras e á propia reorganización do tráfico elimínanse parte das prazas de aparcamento que existen neste momento.
Ademais do cambio de pavimento realizarase a substitución do mobiliario urbano, bancos, papeleiras e luminarias. Tamén se prevé deixar preparados dous foxos para a instalación de colectores subterráneos que se solicitarán á Consellería de Medio Ambiente.
Unha das novidades é o incremento da superficie verde a través dun pavimento de céspede formigón sobre todo na praza do Centro Comercial. Tamén se prevén espazos para a plantación de plantas e arbustos.
As instalacións de electricidade, abastecemento de auga, saneamento e telefonía non se modifican xa as consultas técnicas indican que son aceptables.
Na reunión realizada nos Tilos os/as veciños/as apuntaron que se valorase mover algúns elementos como a marquesiña e a preocupación polo tráfico. Ante a reorganización do tráfico que se prevé apuntaron a posibilidade de reformular os fluxos do tráfico en toda a urbanización para non presionar arterias concretas da zona. As aportacións que se comentaron na reunión foron recollidas polo equipo técnico e valorarase a introdución de moficacións puntuais que as atendan.
O presuposto previsto para esta obra é de case medio millón de euros, concretamente catrocentos setenta mil euros. A actuación está financiada na súa totalidade polo Fondo Estatal de Inversión Local (FEIL) do Ministerio de Administracións Públicas. Este Fondo ten uns prazos de execución moi curtos polo que a actuación realizarase nos próximos meses.
Seccións
Campañas
