Lamenta o cambio de criterio do Partido
Socialista desde o pleno do 30 de agosto en relación co sistema de xestión
das garderías.
O BNG de Teo valora positivamente o feito de que
na sesión celebrada onte saíran adiante o 80% das iniciativas levadas a
pleno. Quere destacar especialmente o aumento da participación cidadán que
facilitará o novo Regulamento de Participación Veciñal; unha ferramenta que,
co interese dos veciños e veciñas de Teo, permitirá un maior protagonismo da
cidadanía no debate político, facilitando que expresen de primeira mans a
súas inquedanzas nos plenos e diante dos seus representantes
institucionais.
Tamén destacan a aposta pola revitalización do
mercadiño de Cacheiras ca nova ordenanza de venda ambulante de Teo, outra
ferramenta que, ademais de dinamizar a vida comercial do concello, aspira a
crear un espacio de cohesión e encontro dos veciños e veciñas, aumentando a
identificación dos novos residentes coa localidade.
Noutros aspectos, o concello de Teo avanza ca
aprobación dunha ordenanza que mellora o transporte adaptado de Teo e coa
corresponsabilidade na financiación de actividades deportivas e culturas que
permitirá unha mellora na prestación do servizo.
Malia os aspectos positivos do Pleno, o BNG non
pode pasar por alto a negativa da oposición a apoiar dous temas de sentido
común. O primeiro é a mellora do servicio de recollida do lixo, da limpeza
viaria e da xardinería; proposta que buscaba unha solución de urxencia a
estes problemas sen pechar as portas a unha revisión de contrato con GESECO.
Esta proposta foi rexeitada polos grupos municipais PSOE, INTEO e PP.
Por último, queremos chamar a atención sobre o
aspecto máis desconcertante do Pleno para a nosa formación. Trátase da
negativa do Partido Socialista a apoiar unha iniciativa presentada pola
Alcaldía de Teo que recollía a proposta socialista do anterior pleno; que
non era outra que as garderías de Os Tilos e Calo pasaran a xestión pública.
No pleno do 30 de agosto o Partido Sociliasta negouse a apoiar a proposta da
alcaldía de que as garderías pasaran a integrarse na rede galega de escolas
infantís alegando que a súa postura estaba situada na xestión pública destes
recintos pero que a súa inclusión na rede pública autonómica suporía unha
perda de autonomía municipal a favor da Xunta de Galiza. Segundo recolle a
acta da sesión do 30 de agosto “O Sr. Leis manifesta que non quere contestar
ás alusións, e que quere facer enmendas á proposta, consistentes en que se
faga a denuncia do contrato e a recuperación da xestión municipal”.
Sorprendentemente, cando a Alcaldía de Teo
renuncia á súa postura inicial de integración na rede galega de escolas
infantís e propón a xestión pública municipal das garderías o partido
socialista da marcha atrás. O seu argumento agora é que a xestión pública é
propia de políticas de esquerdas trasnoitadas e defende a xestión privada
das mesmas, argumentado que “incluso o presidente Lula da Silva de Brasil
está a privatizar o Amazonas”. Durante a sesión o Partido Socialista incluso
presentou unha enmenda que no seu punto 3 di: “No caso de que haxa que tomar
unha decisión, o Grupo Municipal Socialista, cos datos e informacións que
manexa, contrastadas con experiencias de concellos de características
semellantes ao noso e amén da falta de argumentación na proposta presentada
polo Grupo de Goberno, inclínase pola adxudicación do servizo mediante
concurso público”.
Desde o BNG pedimos coherencia nas propostas dos
partidos políticos municipais, sobre todo aos que deben ser os nosos
interlocutores preferenciais. Os cambios tan radicais de postura por parte
do grupo socialista, sobre todo en períodos tan cortos (menos de un mes)
supoñen unha falla de seguridade política que dificulta o entendimento ao
non haber garantías de que ese entendimento se manteña.
Por outro lado, o BNG seguirá defendendo a
xestión pública dos servicios municipais ate onde nos sexa económica e
viablemente posible, pois iso se basea en posturas de principios ideolóxicos
que sempre mantivemos e defendimos.
